KALIBO, Aklan — Sa ginkasa nga hot pursuit operation it kapulisan, nadakpan kaina it aga-aga ro nagbuno-patay sa anang igkampod, kun sa siin ro insidente hay natabu sa Sitio Tongan, Barangay Aquino, Ibajay, bandang alas-10:30 it gabi-i ko Lunes, Disyembre 30, 2024.
Suno kay P/Lt. Reneta Abraham, deputy chief of police it Ibajay Municipal Police Station, matapos nga maka-abot kanda ro impormasyon nga naispatan sa Brgy. Naisud ro suspek nga si alyas Jun, sa legal nga edad ag residente it nasambit nga lugar hay insigidang nagresponde ro mga awtoridad nga nagresulta sa pagka-aresto kana.
Sa imbestigasyon it kapulisan, samtang naga-istorya sa inuman hay nakaangkon it owa pagka-ilintindihan ro suspek ag biktimang si alyas Jefferson, sa legal nga edad ag residente man it nasambit nga lugar.
Matapos nga mapikon, nagbo-oe sigon it daea nga kutsilyo ro suspek ag ginbuno sa biktima.
Kat makitang duguan ag owa eon it alintro hay insigidang nagpaeagiw ro suspek sa indi matumod nga direksyon.
Gindaea pa sa Ibajay District Hospital ro biktima apang gindeklarang dead on arrival it nagtatap nga doktor bangud sa mga patal nga lastro sa anang dughan ag likod.
Nakataeana nga pagapasakaan it reklamong murder ro suspek pinaagi sa inquest proceedings.
