Naaresto ro sangka eaeaki sa Hunan, China matapos sigon nga peke-on ro anang kaugalingon nga pagkamatay sa hana nga paeagiwan ro kasong pagmaneho samtang hilong.
Suno sa pulis, unang gin-aresto ro eaeaking nakilaea kay “Si” ko Enero 2025 bangud sa drunk driving. Nagtuhaw sa imbestigasyon nga daywang beses eon imaw nga nadakpan nga nagamaneho nga owa it lisensiya samtang hilong rason nga posible eon imaw nga makulong bangud sa ikatlong pageabag.
Samtang nakahilway bangud sa piyansa, ginasugid nga nakipagsabwatan imaw sa anang pamilya agud nga himuon ro peke nga lamay. Nagbakae sanda it kabaong ag gin-ayos ro eksena sa andang baeay agud nga mag-itsurang namatay imaw bangud sa drug overdose bago pa-sekreato nga nagpaeagyo paagto sa Yunnan Province.
Sa pihak kara, nataeupangdan it mga awtoridad ro pilang makadueudang detalye, kaibahan ro pagbakae it kabaong bago ro gina-alegar nga pagkamatay, kawad-an it pagtawag sa ambulansiya, ag kawad-an it death certificate ag cremation records.
Pinaagi sa surveillance footage ag bank records, nakumpirma it mga pulis nga buhi pa ro suspek, rason nga ginlunsar ro manhunt nga nauli sa anang pagkaaresto ko Abril 2026.
Bangud kara, ginsentensiyahan si “Si” it limang buean nga pagkakulong ag multang 20,000 yuan. Padayun man nga gina-imbestigahan it mga awtoridad ro anang ina ag lola bangud sa ginasugid nga pagbulig sa pagtago it sangka kriminal.
