KALIBO, Aklan — Arestado ro sangka eaeaki sa sangka buy-bust operation sa Sitio Angol, Brgy. Manocmanoc sa isla it Boracay.
Ginkulong sa Malay Police Station ro suspek nga nakilaea kay Jade Deang Castro, alyas “Jack”, 45, tubong San Pedro Minalin, Pampanga ag presenteng naga-istar sa nasambit nga lugar matapos mabak-ean it sangka sachet it ginadudahan nga shabu gamit ro buy bust money nga P1,200.
Dugang nga an-um nga mabahoe nga sachet it ginadudahan nga shabu ro narekober sa ginapatigayon nga body search.
Kilaea sigon nga nagaduso it illegal nga droga ro suspek ag customer kara ro mga commercial sex workers sa isla. Dati man imaw nga nakasuhan it human trafficking.
Ginpaidaeum ro suspek sa drug test nga magapangatubang sa kasong pageabag sa RA 9165 ukon Comprehensive Dangerous Drugs Act of 2002.
