NATIONAL News — Makaeoeo-oy ro gindangatan it eapsag kat abandonahon it anang mga ginikanan matapos nga gin-unga sa Bulacan Medical Center (BMC) sa siyuudad it Malolos.
Ginkilaea ro mga ginikanan nga sanday Cherry ag Arthur parehong residente it Brgy. Longos, Balagtas samtang ro eapsag nga gin-aywan hay sangka babaye.
Base sa impormasyon, sa bulig it mister, na-admit kan-o eamang ro ina sa nasambit nga ospital nga naging normal ro anang pag-unga rason nga na-discharge apang nagpabilin pa it pilang adlaw ro eapsag para sa dugang nga obserbasyon.
Ulihing nagbisita ro ina ko Hulyo 22 sa anang unga ag umpisa kato hay owa eon uman nga nagpakita sa ospital.
Bangud kara, nakipag-angot eon ro ospital sa natungdan nga lokal nga gobyerno apang owa eon nakita ro mag-asawa sa address nga andang gintau.
Ginasugid nga presenteng sa DSWD ro eapsag para sa nagakaigo nga pag-alaga nga posibleng daehon sa sangka ampunan.
