Balitang Espesyal——-Sangka Egyptian scuba diver ro nakalista it bag-ong world record pinaagi sa pagpabilin sa idaeum it dagat sa sueod it haeos an-um nga adlaw.
Gin-eunip it 29-anyos nga si Saddam Al-Kilany ro kadadaeman it Red Sea ag nagpabilin idtu sa sueod it 145 oras ag 30 minuto agud nga maeampasan bukon eamang ro anang personal nga record nga 121 oras kundi pati man ro presenteng world record nga 142 oras ag 47 minuto nga nailista it taga-Cyprus nga si Cem Karabay ko 2016.
Plano kunta ni Al-Kilany nga magpabilin sa idaeum it tubi it 150 oras, apang ginpundo eon nana ro anang world record attempt matapos ro 145 oras ag 30 minuto para man sa anang ikamayad nga eawas.
Agud nga masigurado ro anang kaeowasan hay may team it medical experts ag scuba divers ro nakabantay kay Al-Kilany samtang ginapatigayon nana ro anang world record attempt.
Dati eon nga gin feature sa balita si Al-Kilany kat gin obra nana ag ko anang nobya ro andang engagement ceremony sa idaeum it tubi ko nagtaliwan nga Setyembre.
