KALIBO, Aklan–Owa man nagpa-ulihi ro mga muslim sa probinsiya it aklan sa pagbuylog sa selebrasyon it Eid’l-Adha ukon feast of sacrifice nga ginadumdum makaron nga adlaw it Sabado, Hulyo 9, 2022 sa bilog nga kalibutan partikular sa nasyong Pilipinas.
Ginpaathag ni Alden Macaponggis,tagapaghambae it Nor Allah Village, sangka muslim community sa barangay camanci norte, numancia nga base sa pagtuo it Islam, raya hay sambilog sa mga nagapangunang religious feast nga nagasimbolo sa pagtapos it hajj pilgrimage ukon pagbiyahe paagto sa sagradong siyudad it Mecca.
Ginadumdum sa raya nga kapiestahan ro daeayawon nga gin-obra it propetang Abraham kun sa siin hay ginsakripisyo kara ro anang bogtong nga unga nga si Ismael bilang pagsunod sa mandu ni Allah , ro Diyos it mga muslim.
Ginpahayag ni Macaponggis nga ginadumdum ro selebrasyon pinaagi sa paghaead ukon pagsakripisyo it kasapatan parikular ro kanding, baka, karnero ag ro pagtililipon it mga mag-igbata ag nagapakita it mayad nga hilimuon ro mga muslim.
Kaeabanan suno kana nga naga-outing sanda sa raya nga okasyon.
Kaibahan man sa selebrasyon ro hugut nga pagpangamuyo it mga muslim.
Samtang, ginkalipay nana ro uman nanda nga pagtililipon ag pagbalik it andang nakaandan nga ritwal ag tradisyon matapos ro haeos daywang dag-on nga pagbawae kara tuga it covid 19 pandemic.
Antes sigon ro selebrasyon hay nagpueong sanda nga mga leaders nga hugut nga ipatuman ro pagsunod sa health and safety protocol.
Sa pihak nga parte, ro pagbuylog ag pagkaeasugot sa gihapon ro nagapangunang pangamuyo it mga muslim sa pagdumdum sa Eid’l Adha bukon eamang sa nasyong Pilipinas kundi sa bilog nga kalibutan.
