Kalibo Aklan ——Magabukas eon sa pagbaton it mga bakasyunista ag turista ro Espanya umpisa Hunyo 1.
Raya hay matapos nga buksan it Spanish Government ro andang mga border para sa pagbaton it mga bisita sa pihak it padayun nga pakikipagsukoe it nasyon sa Coronavirus Disease (COVID-19).
Suno kay Bombo International Correspondent Janette Dizon, nga pagabuksan eon ro mga common areas sa nasambitang nasyon.
Sa pihak it uman nga pagbukas it mga negosyo ag establisyemento ginpahayag ni Dizon nga limitado man sa 50% ro pwedeng i-akomodar it mga hotel ag magapabilin pa nga sarado ro buffet area.
Raya nga tikang hay sangka pamaagi it gobyerno agud mapabaskog ro andang ekonomiya matapos nga mapaki tuga it pandemya.
Dugang pa kara nga maskin amat-amat eon nga nagabalik sa normal ro pagpangabuhi sa nasambitang nasyon hay hugut pa gihapon nga ginamandu ro pagsuksok it facemask ag pag-obserba it social distancing.
Matueopangdan nga gin-anunsyo ni Spanish Prime Minister Pedro Sanchez ro pagpanumbalik it turismo sa andang nasyon ag pagpadayun it mga football matches.
Nakalista ro Spain it total COVID-19 cases nga 282, 370 kung sa siin 28, 678 ro mga namatay samtang naga-abot man sa 196, 958 ro mga nakarecover matapos ro pagbueong ag quarantine procedure.
