Business News ——-Ginpaandaman it Food and Drug Administration (FDA) ro publiko angot sa pagkalhit sa merkado it mga gin peke nga branded nga bueong.
Kaibahan kara ro mga masunod nga bueong nga kaeabanan nga nababakae sa over-the-counter nga ginaeakipan it Mefenamic Acid (Ponstan) 500mg Tablet, Loperamide (Diatabs) 2mg Capsule; Carbocisteine (Solmux) 500mg Capsule; Phenylephrine HCI Paracetamol (Neozep Forte) 10mg/2mg/500mg Tablet.
Suno sa FDA, ro pekeng Ponstan 500mg Tablet hay may nakasueat nga letra sa tableta ag owa nagakinanto sa rehistradong brand it bueong .
Ro pekeng Diatabs man hay iba ro logo, security mark, ag kulay ag itsura it bueong kumpara sa rehistradong brand kara.
Ro pekeng Solmux hay iba man ro logo, security mark ag itsura, kamana man ro pekeng Neozep.
Ginlaygayan it FDA ro publiko nga maging mapag-usisa sa pagabak-eon nga bueong.
Ro mga establisyimento man hay gin-abisuhan nga indi magbaligya it mga pekeng bueong nga naga-angkon it nasambit nga mga kina-iya.
Gin engganyo man it FDA ro mga lokal nga gobyerno nga maghimo it tikang agud nga masiguro nga indi makabaligya it peke nga mga bueong sa andang nasakupan.
