Kalibo Aklan——-Ginaproponer makaron it Federation of Kalibo Tricycle Operators and Drivers Association Incorporation ukon FOKTODAI nga mapataasan ro presenteng panueoktan sa pamasahe sa banwa it Kalibo.
Raya hay kasunod sa naeksperyensyahang krisis sa bilog nga nasyon tuga it COVID-19 pandemic kon sa siin sa new normal scheme hay daywang ka pasahero eamang ro pwede nga isakay sa sangka tricycle.
Suno kay FOKTODAI President Jhonny Damian, nagpadaea sanda it sueat sa Sangguniang Bayan it Kalibo agud nga matalakay insigida ro andang hinyo bangud halin kat nag-eopok ro pandemya hay sanda sa transport sektor ro unang naapektuhan.
Ginpaathag nga bukon it bastante sa pang-adlaw adlaw nga kinahang-eanon it andang pamilya ro presenteng ginakita kon sa siin maskin ro mga nagapangunang baeak-eon hay uwa man naganaba ro presyo rason nga nagakaangay ag bagay man sigon ro andang hinyo nga pataasan ro pamasahe it mga pasahero makaron nga panyempo.
Ginpaathag dugang nga antes sanda nagpadaea it sueat sa SB Kalibo hay nagmeeting anay ro 17 ka mga Presidente sa bilog nga banwa it Kalibo kon sa siin raya ro andang ginkasugtanan nga desisyon matapos nga kapin sa 30 porsyento ro naduea sa andang kita adlaw-adlaw.
Owa man sigon sanda it ginbutang nga figure apang kon sanda ro pagustuhan hay ginahinyo nanda nga doblehon ro siyam pesos nga pamasahe agud nga mag 18 pesos sa kada pasahero.
