KALIBO, Aklan -– Arestado it mga otoridad ro sangka foreman nga nagaduso it iligal nga droga sa ginpatigayon nga buy bust operation kabi-i sa Brgy. Yapak sa isla it Boracay.
Nakilaea ro suspek kay Samuel Jumauid Sr. alyas “Sam”, 42, ag residente it Brgy. Aganan, Pavia, Iloilo ag temporaryo nga naga istar sa nasambit nga lugar.
Insigidang gindakop ro suspek matapos nga mabak-ean it sangka plastic sachet it ginadudahan nga shabu kabaylo it buy-bust money nga P2,200.
Sa pag-body search sa suspek, dugang nga 20 nga sachet it ginadudahan nga shabu ro narekober sa anang posesyon ag kontrol.
Ro operasyon hay ginpangunahan ni P/Maj. Jess Baylon, hepe it Malay PNP, Provincial Drug Enforcement Unit (PDEU)-6 ag Aklan Mobile Force.
Sa makaron hay kulong sa lock up cell it Malay PNP ro suspek ag nakataeanang magapangatubang sa kasong pag-eabag sa RA 9165 ukon Comprehensive Dangerous Drug Act of 2002.
Samtang, ro mga epektos hay igapaidaeom sa laboratory test ag drug test sa suspek.
