Nakataeana eon nga paga-umpisahan eon sa mas madali nga tiempo ro geotechnical design it kontrobersiyal nga Boracay Bridge Project.
Raya ro ginpahayag ni San Miguel Holdings Corporation President Ramon Ang matapos nga gin-award eon it Department of Public Works and Highways (DPWH) sa nasambit nga kompanya ro kontrata para sa pag-finance, pagdesinyo, konstruksyon, operasyon, ag maintainance it nasambit nga proyekto.
Kaibahan sa geotechnical design ro pag-check sa kondisyon it eugta ag mga geological features kara para masigurong euwas ag matibay ro estruktura it tulay.
Sa Notice of Award nga ginpaguwa it DPWH ko Marso 30, 2026, kapin sa ₱7.78 milyon ro magiging budget para sa proyekto nga sa idaeom it 30-year concession agreement it Public-Private Partnership.
Nasayuran nga ro San Miguel Holdings Corporation man ro naga-operate sa Caticlan Airport, eakip eon nagapadayon nga konstruksyon it Caticlan Passenger Terminal Building.
Sa pihak it nasambit nga mga development, hugut nga ginapamaeabagan it Aklan Provincial Government ag Malay LGU ro nasambit nga proyekto.
