Ginkalipay ni Engr. John William Fuerte, manager it Civil Aviation Authority of the Philippines ukon CAAP Aklan ro angot sa plano nga madugangan ro mga international flights sa Kalibo International Airport nga ginaeaumang magatao it manami nga resulta sa bilog nga probinisya it Aklan.
Naga-abot suno kana sa makaron sa 4-7 flights sa nasambit nga paeuparan nga masyadong maeayo kumpara sa pre-pandemic nga may una nga average nga 15-20 international flights.
Dugang pa ni Engr. Fuerte nga haum man sigon ro KIA sa pagbalik it international flights umpisa pa ku Hunyo 2022 kung siin nga nagbalik sa dating sitwasyon ro nasambit nga airport.
Ginpaathag pa nana nga first come first serve basis sigon ro international flight ag hasta nga indi madecongest ro pagdungan it flights hay ma-accommodate sigon nanda raya ukon mausuyan it plotting sa schedule.
Sa makaron hay masarangan it KIA nga magbaton it 3-4 flights it dueueungan.
Dugang pa nana nga may una eun nga mga airlines nga nagpahayag it interes sa nasambit nga plano.
Pahayag pa ni Fuerte nga may schedule sigon ro mga airlines sa mga paeaabuton nanda nga international flights halin sa nagkaeain-eain nga nasyon.
Apang bago pa sigon makasiguro it direct flights halin sa interasadong airlines hay may mga proseso pa nga paga-agyan ukon impormasyon ag kutana nga pagasabton ro KIA.
Sa makaron suno kana hay may average nga 130-150 passengers per airline ukon may adlaw man sigon nga gaabot it 180.
Padumdom man ni Engr. Fuerte nga mas manami nga temprano mag-adto ukon daywang oras bago ro naka schedule nga flight para inde maaywanan it eroplano.
