Arestado ro tatlong trabahante matapos sigon nga gina-alegar takawon ag katayon ro sangka maeahaeon nga arapaima fish nga gina-alagaan sa sueod it sangka resort sa Pagbilao, Quezon.
Suno sa imbestigasyon it mga awtoridad, naispatan sigon ro mga suspek nga ginakabuligan nga mapaguwa ro mabahoe nga isda halin sa fishpond it resort bago raya gindaea sa andang gina-istaran nga quarters sa sueod it establisyemento.
Ro nasambit nga arapaima hay ginaboeobanta nga haeos 25 anyos eon ag may habang masobra sa an-um nga tapak, ag nagabug-at it kapin sa 90 kilo.
Ginaboeobanta nga kapin sa P7 million ro haega kara bangud sa tumaeagsahon nga klase it isda ag mabuhay eon raya nga gina-alagaan it resort.
Base sa paunang imbestigasyon, pinatay ag kinatay sigon it mga suspek ro isda sa sueod it CR ag plano kunta nga hueueayon ro anang karne agud nga iga-uli sa andang natungdan nga mga pamilya ag obrahon nga suea.
Apang insigidang gin-report it sangka security guard it resort ro insidente sa mga awtoridad, nga nagresulta sa pagka-aresto sa tatlo ag pagkarekober sa pilang parte it kinatay nga isda.
Gindaea ro mga suspek sa kustodiya it Pagbilao Municipal Police Station para sa inquest proceedings ag pagpahaum it nagakaigo nga kaso.
Nagapangatubang ro tatlo sa reklamong qualified theft samtang nagapadayun ro imbestigasyon it kapulisan angot sa insidente.
