KALIBO, Aklan — Sangka senior high school student ro nasapwan nga patay matapos nga magbigti gamit ro nylon nga eubid sa sueod it andang baeay sa sitio Maeobong brgy. Lalab, Batan.
Suno kay SPO1 Gelbert Batiles it Batan Police Station, ro biktima hay nakilaea kay Ronel Acuesta, 18 anyos, sangka grade 11 student ag naga-eskwela sa Altavas National High School.
Base sa report, nakita ro biktima it andang kaeapit-baeay nga nakabitin sa baeayan it andang baeay gamit ro eubid rason nga insigidang nagpangayo it bulig.
Sa ginhimo nga imbestigasyon it kapulisan, sangka suicide note ro nakita nga nagapabutyag nga nagpakamatay ro biktima bangud nga nagapangatubang raya it problema sa anang pamilya.
Apang nagapadayun sigon ro andang imbestigasyon sa insidente.
Antes nga nagbigti hay naka-text pa ro biktima sa anang nanay ag medyu nagapamilin-bilin rason nga naalarma ro anang ina ag ginpa-usisa sa andang kaeapit-baeay ro anang unga nga naga-isaeahanon eamang sa andang baeay.
Madumduman nga raya ro ikaywang insidente it suicide sa nasambit nga banwa makaron nga buean it Oktubre.
Gindugang pa ni SPO1 Batiles nga padayun ro information dissemination it LGU-batan ag kapulisan angot sa pagpakamatay nga bukon sigon it solusyon sa mga ginapangatubang nga problema.
Base sa record it pulis, nakalista it limang kaso it suicide ko 2016 sa banwa it Batan ag haeos pitong kaso ko nagtaliwan nga daywang dag-on
