Naintindihan gid it grupong Bayan Aklan ro pagdihon it resolusyon it Sangguniang Panlalawigan may kaangtanan sa pagdeklara bilang persona non grata sa ap-at ka mga kongresista maghalin sa Bicol.
Ginpahayag ni Kim Sin Tugna, Provincial coordinator it Bayan Aklan nga bukon it naging madali ukon hangae ro naging tikang nga ginhimu it SP.
Bilang aklanon dapat sigon nga maging proud kita bangud sangka dungob ro pagpanindugan it lokal nga gobyerno para sa kinamatarong it mga pumueuyong Aklanon.
Nagakadapat eang sigon ro naging tikang it SP bangud ro ginabaeay it mga kongresista sa uman nga pagbuhi it hagna na BIDA GOCC hay nagabayolar sa local government code it probinsya nga kung siin kawad-an man sigon it respeto sa mga Aklanon.
Kinahangean nga mapabilin nga sa idaeom it pagdumaea it lokal nga gobyerno it Aklan ro Isla it Boracay bangud makabig ro Isla nga pinakamabahoe nga nagatao it bulig para sa ekonomiya it probinsy.
Sa pihak nga parte, owa it dapat nga igapangayo it pasaylo sa ap-at nga mga kongresista bangud sa una paeang sanda sigon ro nag-aeapas sa kinamatarong it mga taga Probinsya it Aklan.
Nagaeaum man si Tugna nga magaserbi nga instrumento ro natabo sa iba pang kongresista nga nagahana nga magduso pa sa nasambit nga hagna.
Nagakadapat sigon nga ro mga Bicolanong kongresista ro magpangayo it pasaylo eabi eon gid sa representanti ag mga opisyales it lokal nga gobyerno it Aklan bangud sa kawad-an kara it respeto ag pag-usisa sa sentimyento it mga pumueuyo.
