KALIBO, Aklan — Nagpaguwa eon it mga sueundanan ro lokal nga gobyerno it Kalibo agud nga masiguro nga eowas ag maayos ro selebrasyon it opening salvo it Kalibo Señor Sto. Niño Ati-Atihan Festival sa masunod nga dag-on.
Suno kayay-ar Arante, head it media team it LGU-Kalibo nga raya hay sandig sa ginpaguwa ni Kalibo Mayor Juris Bautista Sucro nga Executive Order No. 56.
May mga karsada nga temporaryo nga igasarado para sa parada nga maga-umpisa alas-12 it udtro adlaw hasta alas-10 it gabi-e.
Sangka direksyon eamang ro dapat sundan it tanan nga banda ag grupo nga magapasakop sa street dancing agud nga mapabilin ro kaayusan.
Hugut man nga igapatuman ro “No Parking Policy” sa palibot it Kalibo Pastrana Park umpisa alas-8 it agahon hasta alas 12 it udtro adlaw.
Samtang ro Cor. Martelino ag Arch. Reyes Sts.; Cor. Martelino ag XIX Martyrs Sts.; portion it Arch. Reyes St. sa prente it Domus Franciscos ag portion it XIX Martyrs, Corner Rizal St. hay temporaryo nga igasarado sa Martes, October 7 bandang alas 12 it udtro adlaw hasta alas-2 it masunod nga adlaw it Miyerkules para sa Bisperas de Opening Salvo.
Samtang, sangka re-routing scheme para sa trapiko ro gintaeana halin sa Paseo de Akean pasueod sa Kalibo Pastrana Park.
May mga traffic officers ag security enforcers ro iga deploy agud nga mag-alalay sa mga motorista ag biyahero.
Magabutang man it mga karatula bilang giya sa bag-ong daeagan it trapiko.
Sa pihak nga parte, ro mga ginabawae sa sueod it festival zones hay ro pagdaea it backpack ukon tote bag; aeak ag iba pang ilimnon nga nakabutang sa glass bottle.
Mga bladed ag pointed weapons, sueo, baril, pampasabog, unlicensed firecrackers, peligroso nga chemicals ukon iba pang bagay nga pwedeng makasakit ukon makapatay kamana man ro mga bukon it otorisadong saeakyan.
Bawae man ro pagdaea it mga lasers, pagpanigarilyo ag vaping, nagabaligya nga mga ambulant vendors, pagpaeupad it drone mag-eowas kon raya hay rehistrado sa LGU ag sa Civil Aviation Authority of the Philippines (CAAP) ag ro pagpilak it basura sa maskin siin eamang.
Ginaboeobanta nga kapin sa 500 nga mga pulis halin sa Aklan PPO, Kalibo MPS ag iba pang force multipliers ro igapakalhit para sa seguridad it festival.
Temporaryo man nga ginsuspinde ro curfew hours sa mga minors umpisa October 8 to 11 basta nga may kaibahan ro mga raya nga ginikanan ukon andang guardians.
Pinaagi sa nasambit nga mga patakaran, handum it LGU-Kalibo ro sangka malinong, organisado, ag makolor nga selebrasyon it opening salvo para sa Ati-Atihan Festival 2026.
