KALIBO, Aklan — Ginasapinal eon it Department of Environment and Natural Reources (DENR) ro guidelines sa pagbisita it mga cruise ships sa isla it Boracay.
Suno kay Environment Undersecretary Sherwin Rigor, kinahange-an sigon nga maibutang sa tama ro environmental guidelines ag ro mga himuong aktibidad it mga turista.
Sa oras nga maisapinal hay insigida raya nga pagatalakayon sa cabinet level meeting it Boracay Inter-Agency Task Force makaron nga dominggo.
Nauna eon kara nga natalakay it task force ro paglimita sa mga cruise liner sa pagdungka sa Boracay sakay ro mga turista halin sa nagkaeain-eain nga bahin it kalibutan.
Suno sa ahensiya nga sambilog raya nga pamaagi agud nga maamligan ro palibot ag mabantayan ro carrying capacity nga 6,405 kada adlaw.
Nasayuran nga kapin sa 30 cruise ships ro ginaeaumang magabisita sa Boracay sa 2019 samtang lima hasta waeong cruise ships pa ro naka-schedule halin kat buksan raya sa publiko ko Oktubre 26 nga ginatantyang may sakay nga 1,700 hasta 4,500 nga mga pasahero.
