KALIBO, Aklan — Arestado sa buy-bust operation it Provincial Drug Enforcement Unit (PDEU) ag pulisya sa Numancia, Aklan ro sangka drug suspect nga naboe-an it 11 bulto it ginadudahan nga shabu nga nagabalor it ginatantiya nga P300,000.
Nadakpan si Bert Lee Tumanon, alyas “Bong”, 49, sangka disc jockey sa Boracay ag residente it Brgy. Joyao-Joyao, Numancia, Aklan sa ginkasa nga operasyon kaina it aga-aga sa Numancia Public Market.
Base sa report, nakipagkasugot ro suspek samtang sakay it van halin sa Boracay.
Nagpadayun ro transaksyon kat nagpanaog sa saeakyan ag pauli eon kunta sa andang baeay sa nasambit nga lugar pinaagi sa pagbaeayluhan it text messages.
Kat gindawat it suspek ro droga kabaylu it P10,000 hay gindakop raya it mga otoridad.
Nabo-oe pa sanang posesyon ag kontrol ro 10 nga iba pang bulto, 4 nga maisot nga sachet ag sangka sachet nga may residue it ginadudahan nga shabu nga naka-igpit sa anang underwear ag short.
Nasayuran nga ro suspek hay dati eon nga nakulong ko 2013 sa kaparehong kaso ag nakaguwa eamang ko nagtaliwan nga dag-on pinaagi sa plea bargaining agreement.
Ro suspek hay nagapangatubang makaron sa kasong pageabag sa RA 9165 o Comprehensive Dangerous Drugs Act of 2002.
