KALIBO, Aklan — Ginpahayag it Henann Group of Resorts nga nagapatigayon eon sanda it kaugalingong imbestigasyon kaangot sa peke sigon nandang environmental compliance certificate (ECC).
Sa interview it Bombo Radyo, ginpahayag ni Atty. Aloysius dela Cruz II, legal counsel it nasambitang resort nga ginausisa pa nanda kon sin-o ro sa likod it pagpalsipika it dokumento ag ginpasigurong magapanabat raya sa laye.
Base sa andang inisyal nga imbestigasyon, sangka opisyal ukon empleyado sigon it resort ro nagsumite it dokumento nga na-isyu sigon ko Oktubre 8, 2018.
Uwa man sigon it ginmanduan ro presidente it Henann nga si Ms. Helen Lim nga magsumite it unofficial ukon pekeng dokumento butang nga nagapatigayon eon sanda it imbestigasyon agud makata-o it update sa Boracay Inter-Agency Task Force.
May ginapangalagaan sigon sandang pangaean rason nga nagasunod sanda sa mga ginapatuman nga ordinansa ag laye.
Aminado ro kompaniya nga inde pa sanda makapag-operate sa uman nga pagbukas it Boracay bangud uwa pa nanda nakompleto ro ginapangayong requirements it DENR, DILG ag DOT kapin eon sa sewage treatment plant (STP).
Uwa man sigon sanda it ginahimong online promotions ukon booking reservations.
Samtang, ginpahayag pa ni Atty. dela Cruz nga sambilog pa sa andang ginatan-aw nga anggulo hay ro posibilidad nga may ibang tawong una sa likod it malisyosong alegasyon.
Ro Henann Group of Resorts hay ginapanag-iyahan it negosyanteng si Dr. Henry Chusuey nga nakabase sa Iloilo City.
Sa makaron ro Boracay hay bukas sa mga lokal nga turista para sa dry run bilang pagpahaom sa Boracay reopening sa Oktubre 26.
