KALIBO, Aklan — Ginpaagi sa saot it mga militanteng grupo sa Aklan ro pagpakita it andang hinaing kontra sa gobyerno sa ika-limang State of the Nation Address (SONA) ni Pangueong Rodrigo Duterte.
Raya hay may temang “Sayaw ng Pagkakaisa”.
Matsa sangka cultural presentation protest ukon ginatawag nandang “One Billion Rising” dance protest nga ginpatigayon sa Kalibo Pastrana Park.
Suksok ro mga makulay nga eambong ag mga bandana, dueoeogan nga nagsaot ro mga nagprotesta sa tunog it mga makabayang kanta nga nagabatikos sa gobyerno nga mabatian sa mga mabaskog nga speakers.
Suno kay Kim Sin Tugna it Bagong Alyansang Makabayan (BAYAN)-Aklan, hugot nandang ginabatikos ro gobyerno ag si Pangueong Duterte bangud sa kontrobersiyal nga Anti Terror Law, palpak nga pagsolusyon it gobyerno sa coronavirus disease (COVID)-19, uwa it ayudang pang ekonomiya, pagduso it charter change ukon cha-cha ag uwa pagta-o it importansya sa demokratikong kinamatarong ag iba pa.
Nakibuylog man sa dance protest ro mga miyembro it grupong “We Are Boracay” nga eubus nga naapektuhan it pandemya.
Ginsiguro man militanteng grupo ro pagsunod sa pagsuksok it face mask, pag disinfect it mga alima ag physical distancing.
