Kalibo Aklan—– Hugot ro implementasyon it Highway Patrol Group (HPG-Aklan) sa ginpaguwa nga sueondanan it Department of Transportaton (DOTr).
Suno kay Pcapt. Nathaniel Florendo it HPG-Aklan, strikto nandang ginapatuman ro “no backride policy” sa mga motorsiklo kon sa siin ro madakpan nga maga-eabag kara hay may nagakaigong penalidad partikular ma-charge ro mga raya sa overloading of passenger.
Tuyo kara nga masunod ro physical distancing agud nga malikawan ro COVID-19 infection nga padayong nagapanaeasa sa bilog nga kalibutan.
Mag-eowas kara, kinahang-ean man nga magsuksok it facemask ro tanan kon nagaguwa sa andang tagsa ka panimaeay partikular sa mga pampublikong lugar kon sa siin ro motoristang madakpan nga uwa it suksok nga face mask hay magapangatubang sa violation nga reckless driving.
Sa makaron sigon hay uwa pa sanda it nadakpan ukon nakasuhan nga nag-eabag sa mga protocols ag gindayaw kara ro mga Aklanon sa pagiging masinueondanon ag nagakooperar sa gobyerno.
Sa pihak kara, nakapokus ro HPG sa mga cargo trucks ag delivery partikular sa mga essential goods agud nga uwa it delay nga matabo.
Hugot nanda nga ginasikyar ro travel pass sticker nga ginadukot sa pertahan it saeakyan agud masiguro nga indi ro mga raya makapanaog mag-eowas eon lang kon makaabot sanda sa andang destinasyon.
