KALIBO, Aklan—Kasunod it mas ginpabaskog nga turismo sa isla it Boracay, igabutang it Department of Tourism (DOT) ro unang hyperbaric chamber center sa isla kon sa siin nagpatigayon it groundbreaking ko kan-o eamang.
Nauna eon nga ginpahayag ni Department of Tourism (DOT) Secretary Christina Garcia Frasco nga tuyo it nasambit nga proyekto nga mas pang panamion ro kalidad it safety diving sa isla ag mai-angat ro wellness tourism nga sambilog sa mga ginapabugae ag ginabalik-balikan nga underwater activities sa Boracay.
Sambilog eamang ro diving sa maabong watersports activities nga pwedeng matestingan it mga turista ag bakasyunista sa bulig it mga professional divers.
Nasayuran nga uwa it mintis ro pagbisita it mga turista sa Boracay nga ko kan-o eamang hay nakaangkon it nominasyon bilang Asia’s Leading Luxury Destination it World Travel Awards.
Angot kara, ginaeauman it lokal nga gobyerno it Boracay nga makaengganyo pa raya it mas maabong international divers bangud nga mabutang eon ro Boracay sa world stage bilang sangka manami nga alternatibong dive destinasyon sa Pilipinas.
