Owa it naging impact ag owa it naging pueos ro Independent Commission for Infrastructure (ICI) kasunod it nakataeana nga pagwakas it anang operasyon sa maabot nga Marso 31 it makaron nga dag-on.
Suno kay Atty Harry Sucgang, political analysts sa Aklan nga makabig nga compliance man lang ro pagbilog it nasambit nga komisyon agud nga mapasugtan ro kagustuhan ni Pangueong Ferdinand Marcos Jr.
Dugang pa nga owa man sigon it naging resulta ro imbestigasyon angot sa maanomalyang flood control projects, bangud nga mag-eowas nga kueang sa pondo ag personnel hay nag-resign eagi ro tatlong pinaka-credible nga miyembro kara ag ro chairman eon lang nga si Atty. Andres Reyes Jr., ro nabilin.
Gintugyan man sigon gihapon sa korte ro mga natipon nga dokumento sa pinaka-grabeng anomalya sa flood control projects nga gina-imbestigahan it ICI nga nag-umpisa ko Setyembre.
Sa una pa eamang umpisa nga maghalin ro tatlong mga importanteng personalidad sa ICI hay makabig eon raya nga patay ag inutil sa pagpatuman it gahum rason nga owa it kapasidad nga mag-contempt ag magpa-aresto.
Hasta sa makaron hay owa naimbestigahan ro mga ginakabig nga big fish nga puro mga opisyal man it gobyerno sa iskandalo it korapsyon sa flood control projects kun sa siin mga contractor ag opisyal pa eamang it DPWH ro nakakulong.
