Ginklaru it Bureau of Animal Industry it Department of Agriculture (DA-BAI) nga indi eagi maapektuhan ro agricultural trade it Pilipinas matapos ipatuman it China ro ban sa pag-import it alagang baboy, wild boar, ag mga produktong baboy halin sa nasyon bangud sa paeag it African Swine Fever (ASF).
Suno sa DA-BAI, ginakilaea nanda ro desisyon it Chinese authorities apang ginpaathag it ahensya nga owa pa man naga-export it live pigs, wild boar, ag angot sa produkto ro Pilipinas paagto sa China.
Base sa report, nagpaguwa ro General Administration of Customs it China it mandu nga nagabawae sa pagsueod it nasambit nga mga produkto halin sa Pilipinas bangud sa ASF concerns.
Ginpahayag it DA-BAI nga padayun ro Pilipinas sa pagpatuman it hugut nga biosecurity measures, kaibahan ro kontrol sa paghueag it sapat, culling ukon pagpatay sa mga naapektuhan, ag mas ginpabaskog nga surveillance sa mga lugar nga may kaso ukon mataas ro risk.
Suno sa ahensya, umpisa nga unang matumod ro ASF sa nasyon ko 2019, nakatutok ro gobyerno sa mga tikang nga sandig sa standards it World Organisation for Animal Health (WOAH) agud nga mapugngan ag eubusan nga mabo-oe ro sakit sa mga alagang baboy.
