POLICE Report — Patay ro sangka ina nga barangay kagawad sa andang lugar matapos nga bun-on sa leog it anang kaugalingon nga unga sa Kidapawan City.
Nakilaea ro biktimang si Kagawad Mila Lagutin Cinco, 69, samtang ro suspek nga nadakpan it mga awtoridad hay si Emiliano Lagutin Cinco, 49, owa it asawa, ag parehong residente it Purok 2, Brgy Gayola, Kidapawan City.
Base sa report, bandang alas-4:45 hapon it Sabado, Oktubre 12, 2024, kat matabu ro krimen sa baeay it mag-ina sa nasambit nga lugar.
Sa imbestigasyon it kapulisan, nakaangkon it diskusyon ro mag-ina kat gulpi eamang nga nagbo-oe it kutsilyo ro suspek ag ginbuno ro ina sa anang leog ag iba pang parte it eawas nga naging rason it anang hinali nga kamatayon.
Madasig man nga rumesponde ro mga awtoridad sa lugar it gin-eontaran it krimen ag nadakpan ro suspek apang may una raya nga nina sa dughan ag insigidang gindaea sa ospital para sa nagakaigo nga medikasyon.
Nakakulong makaron sa lock-up facility it Kidapawan City-PNP ro suspek ag nakataeanang pagapasakaan it nagakaigo nga kaso.
Padayun man ro ginahimo nga imbestigasyon it pulisya para masayuran ro ugat it gin-awayan it mag-ina.
