KALIBO, Aklan—Mag-doble dahan sa sunog makaron nga Fire Prevention Month.
Suno kay Fire Senior Inspector Joseph Cadag it Bureau of Fire Protection ukon BFP-Kalibo nga kada dag-on hay sambilog eamang ro katuyuan it andang taeatapan nga mabawasan ag malikawan ro pag-angkon it sunog ag maging eowas ro tanan.
Ro tema sigon it BFP makaron nga dag-on hay ‘Matuto ka, Sunog ay Iwasan na’.
Sapat suno kana hay bukon eamang it kada Marso kita maga-dahan kontra sa sunog kundi kada adlaw.
Kada buean it Marso sigon ro pinakamayad nga tiempo agud nga mas pang pagapabaskugon ro pagtau it paandam ag impormasyon sa mga tawo bangud nga kaeabanan kara nga nagakatabu ro maabung sunog.
Raya man sigon ro senyales it pagsueod it tiempo it tag-init, rason agud nga mas magbaskog ro kunsumo it tawo it kuryente nga pwedeng pagahalinan it sunog.
Gin-umpisahan it BFP-Kalibo ro Fire Prevention Month pinaagi sa motorcade it mga fire truck ag firefighters ko domingo nga adlaw.
Tuyo sigon it aktibidad nga pabaskugon ro fire safety awareness campaign it publiko.
Nagpanupod man sanda it mga flyers ag nagapatigayon it house to house inspection agud nga mabugtaw ro mga pumueuyu sa mga dapat obrahon agud nga malikawan ro sunog.
