Bukas sa posibleng diplomatikong pag-istorya ro Iranian President nga si Masoud Pezeshkian sa Estados Unidos angot sa ginatawag nana nga “path of confrontation is more costly and futile than ever before.”
Ginhimo it opisyal ro pahayag pilang oras bago magtau it pahayag si U.S. President Donald Trump angot sa sitwasyon it giyera sa Iran nga gintawag nana nga “important update.”
Nauna eon nga ginpahayag ni Trump nga naghinyu eon sigon ro Iran it cease-fire nga insigida man nga ginpamalibaran ni Iran’s Ministry of Foreign Affairs Spokesman, Esmaeil Baghaei.
Sa mensahe nga ginpaguwa it Iran, gin-insister ni Pezeshkian nga sa kasaysayan it Iran sa pag-tubang sa mga mananakop ag kinagamo, owa maskin kan-o nagpa-umpisa it giyera ro andang nasyon.
Ginpamilit pa kara ro importansiya it pag-istorya it daywang nasyon nga may mabahoe nga epekto sa masunod nga henerasyon.
Ginklaru man ni Pezeshkian nga owa sanda it kaeain it buot sa ibang mga nasyon kaibahan ro Amerika, Europa, ukon mga kaiping nga nasyon.
Bukon pa it klaru makaron kon ro nasambit nga ginpaguwa nga mensahe hay nagasakop sa bilog nga gobyerno it Iran bangud nga ro Supreme Leader it nasyon ro may ulihing desisyon sa mga nagapangunang isyu kaibahan ro negosasyon sa Washington.
