NEWS Analysis– Igalunsar eon it Department of Education (DepEd) ro bag-ong Kinder to Grade 10 (K-10) curriculum.
Suno sa DepEd, ro implementasyon it “decongested” K-10 curriculum hay paga-umpisahan sa school year 2024-2025.
Base sa pag-estudyo sa K-10, nakita nga masyadong congested ro presenteng curriculum nga nagakahueugan nga maabu nga kinahangean nga matun-an ro mga estudyante kamana man nga maabu nga kinahangean nga ituro ro mga titser sa sueod it sangka school year.
Bangud kara, masyadong mabudlay nga matun-an ro nasambit nga mga asignatura.
Rason nga agud nga mas pang mapabaskog ro kalidad it basic education sa atong nasyon, sa bag-ong curriculum hay pagataw-an eon lang it pokus ro mga asignatura kapareho it math, science, english, reading ag values formation.
Pag-abot man sa K-12, suno sa DepEd, nagapadayun ro pag-review kara.
Madumduman nga nagbilog ro ahensya it sangka national task force ko Mayo para tun-an ro implementasyon it senior high school program bangud sa pagiging bukon it epektibo kara kun sa siin nabudlayan gihapon ro mga nag graduate sa Senior High School nga maka-usoy it trabaho.
Nauna eon nga ginpahayag ro pagrepaso sa K-12 curriculum para makapag-produce it mas competitive, job-ready, active ag responsible graduates.
Nagaeaum ro kaabuan nga ro igalunsar nga K-10 hay magiging mas epektibo para sa edukasyon.
Owa man it maeain sa pagbag-o eabi eon kon raya hay para sa kamaeayran it tanan.
Raya hay maskin nga indi malikawan nga maguluhan eon man ro mga estudyante ag ginikanan.
Siguradong nagkaeain-eain nga reaksyon ro magatuhaw apang sa ulihi, owa man kita it ibang ginahandum kundi nga mapamayad ro lebel it edukasyon, bukon eang para sa atong mga pamatan-on kundi para sa paeaabuton it nasyon.
Maaeam, talentado, matiyaga ag madiskarte ro mga estudyanteng Pinoy, kinahangean eang ro nagakaigo nga paggiya halin sa mga ginikanan ag manugturo, ag suporta halin sa atong gobyerno.
