KALIBO, Aklan—Haom eon ro Kalibo International Airport sa oras nga magbalik eon ro byahe it mga eroplano matapos nga ginbutang sa modified general community quarantine ro bilog nga probinsya it Aklan.
Suno kay Civil Aviation Authority of the Philippines ukon CAAP Aklan manager Engr. Eusebio Monserate Jr. nga haom eon sanda sa pagbaton it mga pasahero sa paeoparan engkaso nga pasugtan eon ro mga airline companies nga magbyahe it domestic ag international flight.
Una kara, ginkansela it Civil Aeronautics Board ukon CAB ko Mayo 30 ro mga flight schedule ag ro pagbaligya it mga tickets base sa rekomendasyon it Inter-Agency Task Force on Emerging Infectious Diseases.
Sa makaron suno kana hay nagahueat eon lang sanda it abiso kon san-o gid ro pormal nga pagbukas it paeoparan.
Ginpasiguro man kara nga nakaplastar eon ro andang health protocols ag guidelines para sa mga pasahero nga magaagi sa KIA.
Samtang, bilang kaparte it ginatawag nga new normal hay 50 porsyento eamang ro pwede nga makasakay sa eroplano para matuman ro physical distancing nga kapin sa sang metro hasta sa daywang metro ro antad sa kada isaea.
