KALIBO, Aklan—Mas pang ginhugtan it pulisya ro kampanya kontra sa tanan nga klase it sugae sa probinsiya it Aklan partikular ro illegal cockfighting ukon bueang nga kaeabanan nga ginapatigayon sa mga maeayo ukon tago nga lugar.
Suno kay P/Capt. Willian Aguirre, acting head it Provincial Intelligence Branch ukon PIB-Aklan ag hepe it anti-illegal gambling task force nga ginatutukan nanda makaron ro mga bueang bangud ro nasambit nga aktibidad hay posibleng maging rason it outbreak it COVID-19 bangud sa kawad-an it physical distancing.
Raya hay matapos nga haeos tanan nga mga municipal police stations sa Aklan hay naka-aresto it mga nagapatigayon it bueang.
Ginpadumdum pa ni P/Capt. Aguirre ro publiko nga ro bueang ag iba pang klase it sugae hay hugut nga ginabawae eabi eon makaron nga tiempo nga may ginapatuman nga community quarantine tuga it covid 19, kun sa siin madasig nga nagakalhit ro virus sa mga public gatherings.
Madumduman nga haeos tanan nga mga COVID infection sa bilog nga Mindanao hay naghalin sa bueang.
Samtang, plano man nanda nga masueod ro chat group it mga sabungero agud nga masubaybayan ro andang aktibidad.
Nagtukod man sigon imaw it kaugalingon nga mga operatiba agud nga madali nga madakpan ro mga nagapatigayon it illegal gambling.
Kaibahan kara ro mga sugae sa mga namatyan.
Samtang, gindugang pa ni P/Capt. Aguirre nga hugut ro naging pagpadumdum ni Provincial Director P/Col. Esmeraldo Osia Jr. sa mga pulis nga mapamatud-an nga eakot sa bueang bangud nga may nagakaigo raya nga penalidad ag posibleng magapangatubang sa kasong grave misconduct.
Nagapadayun man sigon ro mandu nga one strike policy sa ginpabaskog nga kampanya kontra sa illegal gambling.
