KALIBO, Aklan—Sa pihak it paeag sa ikaayong eawas it ginapangatubang nga pandemya, masako man ro Philippine Drug Enforcement Agency (PDEA) region VI sa mga ginapatigayon nga anti-drug operation sa bilog nga rehiyon.
Suno kay PDEA region VI spokesperson Shey Tanaleon, uwa nagapundo ro ahensya sa pagmonitor agud nga masakote ro mga identified drug personalities nga nagapadayon sa pagduso ag paggamit it illegal nga droga nga ginpalala it krisis tuga it pandemya bangud sa kawad-an it trabaho.
Mas pa sigon nanda nga ginpabaskog ro andang linyada bangud nga ro transaction makaron it illegal nga kontrabando hay mobile ukon buot hambaeon uwa nagatinir sa sangka lugar ro drug personalities ag ro anang transaction para eamang kumita it kwarta sa madaling pamaagi.
Sa pihak kara, sa kabilugang 4,071 barangays sa Western Visayas hay masobra sa 3,000 barangays pa eamang ro nadeklara nga drug cleared samtang ro nabilin nga iba pa hay under monitoring ukon may una sa gihapon nga mga drug personalities nga naga-exist.
Samtang sa probinsya it Aklan, sa kabilugang 327 barangay hay 304 eon ro nadeklara nga drug cleared ag ro nabilin nga iba pa hay sigidas ro andang surveillance bangud nga may una sa gihapon nga illegal transaction nga nagakatabo.
Apang, 90 porsyento eon man sigon ro status rate it probinsya sa pagtinguha man it mga natungdan nga opisyales it barangay ag mga otoridad nga malimpyuhan ro andang komunidad halin sa illegal nga droga.
Pagaeauman sigon ro sunod-sunod nga anti-drug operation sa mga masunod nag inadlaw agud nga daeayon nga malimpyuhan ro rehiyon sa illegal nga aktibidad.
