KALIBO, Aklan—Nagapadayon ro imbestigasyon it theft and robbery section it Kalibo Police Station kaangot sa panakawan nga nag-eontad sa Sitio San Nicolas, Barangay New Buswang, Kalibo, Aklan.
Una kara, nagreport sa taeatapan it pulisya ro tagreklamong si Anabelle Antonio, 52-anyos ag residente it nasambitang lugar matapos nga ginsueod it uwa pa makilaeang suspek ro andang panimaeay.
Suno sa biktima, natigayon nga natakaw it mga suspek ro anang alahas nga ginakaeakipan it singsing, aritos ag polseras nga nagabalor it P80,000 ag cash money nga kapin sa P10,000.
Antes ro insidente, nagguwa sigon ro biktima bandang alas-3:00 it hapon kaibahan ro anang pamilya kon siin ginapatihan nga nadiskubrehan it suspek ro duplicate it andang yabe sa baeay nga nakasab-it ag ginabilin sa guwa it pwertahan.
Nakibot eon lang ro mga raya nga sa andang pagbalik hay nagkaealhit eon ro andang mga kagamitan sa sueod it baeay ag sa pagpangusisa hay uwa eon sa bueotangan ro nasambitang alahas ag kwarta.
Ginapatihan nga sa mayor nga pwertahan nag-agi ro mga suspek nga hasta sa makaron hay uwa pa matumod it biktima ag mga otoridad.
Nasayuran nga sa Antonio hay tag-iya it sangka jewelry shop iya sa banwa it Kalibo.
