NATIONAL News —- Nagapameligro pa nga magamahae ro lokal ag imported nga baboy antes nga mag-Disyembre.
Maga-abot sa P20 ro posibleng igasaka sa presyo it kada kilo it baboy bangud sa pagmahae it raw materials it feeds ag padayun nga paghina it piso kontra dolyar.
Suno kay Agricultural Sector Alliance of the Philippines president Nick Briones, naka-apekto man ro African Swine Fever (ASF) nga hasta sa makaron hay nabatyagan it mga hog raiser sa nasyon.
Maabu pa sigon nga rehiyon ro may mga kaso it ASF ag kapin sa 22 nga banwa sa 12 nga probinsiya ro may mga aktibong kaso.
Ginpamilit ni Briones nga owa pa nakakabawi ro mga naga-alaga it baboy bangud nga owa pa eubusan nga nasolusyonan ro andang problema.
Ginaeauman nga magataas pa ro demand sa baboy ag manok samtang nagahilapit ro holiday season.
