Kalibo Aklan ——–Aminado si Dr. Jeanette Ortega, sangka Psychiatrist ag Mental Health Advocate sa Aklan nga maka-alarma ro nagatinaas nga kaso it pagpakamatay sa probinsiya.
Sa kamatuoran suno kana hay sambilog ro Aklan sa ginatutukan makaron sa bilog nga Western Visayas.
Angot kara, nagpaandam si Dr. Ortega nga bukon it hinangae ro depresyon bangud nga kaeabanan raya nga nagaresulta sa pagpakamatay kon mapabay-an.
Owa sigon it ginapili ro depression bangud nga maskin ro mga tawo nga una eon kana ro tanan hay pwedeng matamaan kara.
Maabu sigon nga rason ro pag-angkon it depresyon kapareho it stress sa adlaw adlaw nga gina-agihan , problema sa relasyon partikular sa lovelife, kwarta , trabaho, anxiety bangud sa lockdown tuga it naexperiensiyahan nga COVID-19 pandemic ag maabu nga iba pa.
Pila sigon sa mga sintomas it depresyon hay ro mabuhay nga pagiging masueub-on, iritable, ag matsa indi mapakali.
Raya suno kana ro dapat nga bantayan it mga ginikanan sa andang mga unga.
Ginpaathag pa it mental health advocate nga makabulig it mabahoe sa mga nagaexperiensiya it depresyon ro pakikipag-istorya sa ibang tawo, pag-angkon it recreational activities, healthy ag positive lifestyle, ag eabaw sa tanan ro support group halin sa mga masaligan nga amigo ag atensyon it pamilya.
Indi sigon makabulig sa pagsolbar it problema ro aeak ukon illegal nga droga.
Makabulig man suno kana sa paglikaw sa depression ro pag-exercise bangud nga ginapaguwa kara ro mga endorphins ukon ro “joy hormones”.
Madumduman nga sa Aklan , nakalista eon it 34 nga kaso it mga pagpakamatay umpisa Enero hasta it presenteng buean.
Mas mataas sigon raya kumpara sa 10 nga insidente ko 2019.
Samtang para sa mga tawo nga nakaexperiensiya it depresyon, pwedeng magtawag sa Hopeline it DOH sa numero (02) 804-4673 ag 0917-5584673 para sa counselling ag iba pang impormasyon.
