Insigidang gintaw-an it igtaeopangod ag gin-imbestigahan it Malay-Boracay Tourism Office ro angot sa reklamo it sangka turista kon sa siin na-scam raya it kapin sa P18,000 pesos it nagpakilaeang tour coordinator.
Suno kay Kathrine Licerio, tagapaghambae it nasambit nga taeatapan, nasayuran nga ro scammer hay nauna eon nga gindeklarang persona non grata it lokal nga gobyerno it Malay pinaagi man sa sangka resolusyon nga ginpasa sa Sangguniang Bayan bangud sa bukon it manami kara nga imahe ag nagasamad sa sektor it turismo.
Ginpangaeanan ni Licerio ro nagpangbiktima nga si Mr. Jess Yuson Magpusao, taga-Numancia ag ginamit pa kara ro uniform ag ID it Parameter travel and tours.
Ginpaathag nana nga ro nasambit nga travel agency hay lehitimo nga naga-operate sa isla apang bukon it konektado kanda si Magpusao ag uwa anuman nga lehitimong transaksyon kanda raya.
Ginkasubo it tourism office ro nasambit nga hitabo ag nagapadayon pa ro andang imbestigasyon sa insidente.
Samtang sa pihak nga parte, hugot nga nagpaandam ro nasambit nga taeatapan nga inde magpati sa mga ginatanyag nga serbisyo kon inde mausisa kon lehitimo gidman baea nga naga-operate ro travel agency pati ro nagapakilaeang tawuhan kara.
Nagpadumdom man imaw sa tanan nga may planong magbakasyon ag magbisita sa Boracay nga maging vigilante ag mapang-usisa.
Pwede man suno kana makatawag sa andang taeatapan ukon maging sa Department of Tourism kon lehitimo ro mga ginaboe-an nanda it serbisyo agud nga inde mabiktima it manugloko.
