HEALTH News– Pagabuksan eon sa Victorias City sa Negros Occidental ro kauna-unahang remote rabies laboratory sa Negros Island.
Raya hay sa idaeum it pakikipagbueuligan it Japan International Cooperation Agency (JICA) ag Philippines One Health Rabies nga nagatuyo nga matapna ro nasambit nga viral disease sa Pilipinas.
Ro pasilidad nga ginaeauman nga maga-operate sa Agosto hay magagamit it Japanese-developed lateral flow device ukon immunochromatographic test (ICT) kits para sa early detection it rabies.
Suno kay Dr. John Michael Cabuguason, city veterinarian, makabaton it probisyon it rabies test kits ag technical training ro siyudad samtang magatau man it lugar para sa testing laboratory ro lokal nga gobyerno kara.
Ginpahayag dugang nga maskin nga ro rabies hay “100 percent fatal”, raya man hay “99 percent preventable” rason nga importante ro madasig nga diagnosis agud nga maumpisahan eon ro insigidang pagbueong.
Sa Negros Occidental, kaeabanan nga nabubuhayan antes nga matumod ro kaso it rabies bangud nga ro tawo nga naangkit it ayam hay ginadaea pa sa regional laboratory sa Iloilo City para sa confirmatory testing.
Mabuligan man it remote rabies laboratory ro mga kaiping nga lokalidad sa Negros Occidental.
Ro nasambit nga ICT kits hay epektibong makatumod it rabies sa sueod eamang it 30 minutos kumpara sa kaeabanan nga daywa hasta tatlong oras.
Raya hay na-develop it Oita University sa Japan ag Japanese pharmaceutical firm ADTEC.
