KALIBO, Aklan–Mas pang naga-aray ro mga tricycle driver matapos nga maging epektibo eon umpisa makaron nga adlaw ro dugang nga presyo sa produktong petrolyo.
Suno kay Ronelo Rotayro, tricycle driver nga may biyaheng Andagao nga haeos indi eon makabawi sa andang sang adlaw nga kagaoy ag sakripisyo ro andang ginakita.
Masami sigon nga haeos sakto eang nga pambakae it bugas ag suea ro andang mai-uli ag owa eon it sobra para sa iba pang kinahang-eanon it pamilya.
Kung amat sigon hay nagahinyu pa imaw sa anang operator nga utangon anay ro boundary eabi pa kun maeanghay ro biyahe.
Sa pihak nga parte, maskin ro mga ordinaryong pumueoyo nga nagagamit it andang natungdan nga behikulo hay batyag man ro sigidas nga pagtinaas it presyo it petrolyo.
Ginpahayag ni Jovit Dela Cruz it Brgy. Estancia, Kalibo nga owa sanda it mahimo kundi padayun nga magbakae it gasolina bangud kinahang-ean raya it andang tricycle nga ginagamit bilang service it anang pamilya.
Nagaeaum sigon sanda nga makaangkon man it pagnaba sa presyo it langis agud nga mahagan-haganan ro epekto kara sa mga pumueoyo.
