NATIONAL News —- Otomatikong suspendido eagi ro klase sa tanan nga lebel sa basic education, online ag in-person sa tanan nga mga lugar nga may una nga deklarasyon it “typhoon, flood ukon rainfall warning” nga ginpaguwa ro Philippine Atmospheric, Geophysical, and Astronomical Services Administration (PAGASA).
Raya ro nakabaehag sa ginbag-ong guidelines nga ginpaguwa it DepEd may kaangtanan sa kanselasyon ukon suspensyon it klase ag trabaho sa eskuwelahan pag-abot it bagyo, sigidas ag mabaskog nga uean ag pagbaha.
Sa tiempo nga may bagyo, ro in-person ag online classes sa tanan nga lebel hay otomatikong kanselado sa mga eskuwelahan nga ro Local Government Units (LGUs) hay may Tropical Cyclone Wind Signals (TCWS) 1, 2, 3, 4 ukon 5 it PAGASA.
Kun ro TCWS hay ginpaguwa sa tiempo nga ro klase hay nag-umpisa eon, dapat nga insigidang suspendihon it eskuwelahan ro klase ag trabaho ag dayun nga pauli-on ro tanan sa andang baeay, kon eowas raya nga obrahon.
Sa pihak kara, obligado man ro eskuwelahan nga ipabilin nga eowas ro mga estudyante ag mga tawuhan kara sa sueod it eskuwelahan kun ro pag-byahe hay bukon eon it eowas.
Ro Local Chief Executive man ro magadesisyon it kanselasyon ukon suspensyon it klase sa mga kahigayunan nga mabaskog ro huyop it hangin sa partikular ukon tanan nga lugar it LGU apang bukon it bangud nga may una nga bagyo.
Para man sa heavy rainfall ukon grabeng buhos ag mabaskog nga pag-uean, ro in-person ukon online classes sa tanan nga lebel hay otomatikong kanselado sa mga eskulwahan nga makit-an sa LGUs nga may ginpaguwa nga Yellow, Orange ag Red Rainfall Warning it PAGASA.
Kun ro warning hay ginpaguwa sa tiempo nga ro klase hay nag-umpisa eon, otomatikong pagasuspindihon it eskuwelahan ro klase ag trabaho ag insigidang pauli-on ro mga estudyante ag tawuhan it mga raya sa andang baeay, kon raya hay eowas pa nga obrahon.
Sa pihak kara, ro mga eskuwelahan hay obligado nga ipabilin nga eowas ro mga estudyante ag tawuhan kara sa sueod it eskuwelahan kun ro pagbyahe hay bukon eon it eowas.
Ro Local Chief Executive gihapon ro magadesisyon it kanselasyon ukon suspensyon it klase sa kahigayunan nga may una nga “torrential rains” sa partikular ukon tanan nga lugar it LGUs apang owa it ginpaguwa nga Heavy Rainfall Alert halin sa PAGASA.
Samtang, sa tiempo man it pagbaha, ro in-person ag online classes sa tanan nga lebel hay otomatikong kanselado sa mga eskuwelahan sa LGUs nga may una nga ginpaguwa nga Flood Warning ro PAGASA.
Kun ro Flood Warning hay ginpaguwa sa tiempo nga ro klase hay nag-umpisa eon, insigidang pagasuspindihon ro klase ag trabaho ag insigidang paulion ro tanan sa andang mga baeay, kun eowas para raya nga obrahon.
Sa pihak kara, obligado man ro mga eskuwelahan nga ipabilin nga eowas ro mga estudyante ag tawuhan sa sueod it eskuwelahan kun ro pagbyahe hay bukon eon it eowas.
