KALIBO, Aklan — Mabahoe ro pagpasaeamat it mag-asawa ag bukon it grabe ro andang ginakaeakutan nga aksidente bandang alas-10:00 it agahon ko nagtaliwan nga adlaw sa national highway nga sakop it Sitio Bangbang, Brgy. Calizo, Balete.
Base sa report, sakay it andang kotse nga ginamaneho it asawang si Pablo Sucgang, Jr., principal it Lalab Elementary School kaibahan ro misis nga si Jenel Sucgang, parehong residente it Brgy. Ambulong, Batan kat bungguan it delivery truck nga ginamaneho ni Carlos Manzana, 50, residente it Sto. Cristo City, Tarlac.
Natabu ro aksidente sa pakurbada nga karsada sa nasambit nga lugar samtang nga nagapa-agto kunta ro mag-asawa sa banwa it Kalibo agud nga magtambong sa ginpatawag nga emergency meeting it Department of Education ukon DepEd-Aklan kat aksidenteng mabungguan it truck nga pabalik eon sa Iloilo matapos nga mag-deliver it bottled water.
Insigidang gindaea ro mag-asawa sa sangka pribadong ospital bangud sa pilang lastro nga naagum samtang ro truck driver hay ginkustodiya it Balete Police Station.
Nasamad ro prente it driver’s seat ag napaeos ro waea nga kariton sa unahan it kotse it mag-asawa.
Suno sa truck driver nga naduea-an imaw it kontrol sa manibela rason nga inagaw ro pihak nga linya it karsada ag bumangga sa kasub-eang nga kotse.
