KALIBO, Aklan—Nagbaton it P2,000 ro mga pumueoyo it banwang Kalibo ag Makato halin kay Sen. Christopher Lawrence “Bong” Go.
Raya hay kadungan sa pagbukas it Malasakit Center sa Aklan provincial hospital kamana man sa simultaneously nga pagpanupod it Civil Service Commission (CSC) it food packs ag cash sa mga regular nga empleyado it gobyerno sa idaeom it andang proyekto nga “oplan pag-ulikid para sa aton nga lingkod bayani”.
Suno kay Provincial Social Welfare Development Office (PSWDO) head Evangeline Gallega, ro nasambitang kantidad hay halin mismo sa senador ag ro mga pumueoyong gintaw-an hay mga totally damage ro andang panimaeay tuga it pagpanaeasa it bagyong Ursula ko Disyembre 25, 2019.
Ginpahayag dugang nga uwa pa imaw it ideya kon san-o makabaton ro mga pumueoyo it ibang banwa.
Samtang sa pihak nga parte, ginatinguhaan sigon makaron it Department of Social Welfare and Development (DSWD) Region VI nga maita-o eon sa mga senior citizen sa first quarter it presenteng dag-on ro andang social pension nga P3,000 ukon katunga sa andang nabaton ko nagtaliwan nga dag-on.
Ginlaygayan kara ro mga social pensioner nga maghueat-hueat lang anay bangud nga sigurado nga mabaton mat-a nanda ro nasambitang haega it kwarta apang uwa pa it petsa nga ginta-o ro ahensya.
Nasayuran nga ro ibang banwa hay tig-P3,000 pa eamang ro nabaton nga social pension it mga senior citizen sa baylo nga P6,000 sa sueod it sang dag-on.
