KALIBO,Aklan– Naging madinaeag-on ro ginpatigayon nga legislative inquiry it mga natungdan nga komitiba it sangguniang panlalawigan it Aklan angot sa presenteng estado it probinsya.
Raya ro ginpahayag ni Aklan first district board member Nemesio Neron kon sa siin imaw ro nagproponer nga makaangkon it legislative inquiry agud nga masayuran ro estado it Aklan.
Raya hay matapos ro mga nag-eontad nga insidente nga imbolbado ro mga ginasugid nga miyembro it New Peoples Army ukon NPA.
Ginkumpirma man nana nga nagapabilin nga insurgency free ro bilog nga probinsya it Aklan.
Nauna eon nga ginpaathag ni Atty. Flosemer Chris Gonzales, tagapaghambae it Regional Task Force to End Local Communist Armed Conflict (RTF-ELCAC) nga ro engkwentro nga nag-eontad sa tunga it tropa it Philippine Army ag New Peoples Army sa kabukiran nga sakop it banwa it Libacao ag ro extortion sa sangka negosyante nga ro entrapment sa suspek hay natabo sa banwa it Makato hay inde makabig nga parameters agud nga ideklara nga bukon eon it insurgency free ro Aklan.
Mag-eowas kara, uwa man it territorial command ro NPA sa probinsya.
