BANGA, Aklan — Aminado ro lokal nga gobyerno it Banga nga nakaangkon it owa pagka-ilintidihan sa pag-install nanda it kapin sa 40 nga mga closed-circuit television (CCTV) camera nga direktang ginkabit sa linya it kuryente it Aklan Electric Cooperative (Akelco).
Suno kay Local Disaster Risk Reduction Management Office (LDRRMO 3) Joey Peren nga bangud sa naga-eksister nanda nga joint pole agreement sa Akelco hay gin-“assume” kara nga pwedeng direktang mag-tap it wire sa linya it kuryente nga owa eon nga nagpa-abiso.
Ginpamilit pa nana nga sangka “honest mistake” ro natabu bangud nga owa nana na-review ro kaundan it kasugtanan, kun sa siin, ro poste eamang gale it Akelco ro pwede nanda nga magamit.
Dugang pa nana nga bangud nga owa it electric bill nga naga abot hay gin-eaum nana nga gin-eakip ro baeayran sa billing it munisipyo sa andang ginabayran nga konsumo it mga street lights.
Nauna eon nga ginpahayag ni Atty. Ariel Gepty, General Manager it AKELCO nga sangka pag-eabag sa Republic Act 7832 ukon Anti-Electricity Pilferage Act ro ginhimo it LGU-Banga nga illegal tapping ukon pag-tap it wire diretso sa linya it kuryente nga owa it tamang electric meter ukon kontador.
Ginaboeobanta suno kana nga naga abot sa kapin sa P400,000 ro posibleng multa nga paga atubangon it LGU-Banga.
Nadiskubre ro bayolasyon matapos ro ginpatigayon nga inspection it Akelco sa nasambit nga lugar.
LDRRMO 3 Joey Peren it LGU-Banga
Sa pihak nga parte, ginpahayag ni Banga Mayor Boy Redison nga maskin imaw hay nakibot sa nabaton nga notice of apprehension it munisipyo halin sa AKELCO.
Nakaangkon eamang sigon it misunderstanding nga makaron hay gina-ayos eon ni Mr. Peren ag pamunuan it Akelco.
Banga Mayor Boy Redison
