KALIBO, Aklan — Ginpasiguro it lokal nga gobyerno it Kalibo nga mas pa gid nanda pagapasadyahon ro selebrasyon it Kalibo Sr. Sto. Niño Ati-Atihan festival sa Enero 2026.
Suno kay Sangguniang Bayan member Ronald Marte, chairman it Committee on Tourism, Culture and Arts nga raya hay makita sa pagahiwaton nga opening salvo sa Oktubre 8 it makaron nga dag-on.
Makaangkon suno kana it Ati-Atihan parade sa Crossing Maagma ag Mabini Sts. nga pagapangunahan it provincial government it Aklan ag LGU-Kalibo.
Ro sneak peak it ginaeauman nga matabu sa Ati-Atihan celebration sa Enero 18, 2026 hay makatau it impresyon nga mas magiging hugut ro kompetisyon bangud nga maabu sigon nga mga grupo ag tribu ro magapasakop.
Samtang, kumpiyansa man si Marte nga ro opening salvo hay magiging eowas ag madinaeag-on maskin nga kapin sa 10,000 hasta 15,000 nga mga bisita ro ginaeauman nga magabuhos agud nga makisadya sa event.
Magadugang sa kasadyahan ro performance it sikat nga singer nga si Elias kaibahan ro anang banda.
Sa nakasanayan, uman nga igasarado sa mga saeakyan ro mga kalye pasueod sa festival zone sa Kalibo Pastrana Park.
Ginaboeobanta nga 500 nga mga police officers ro iga-deploy kaibahan ro augmentation force halin sa Aklan Police Provincial Office ag force multipliers para sa opening salvo nga magabuhay hasta sa Oktubre 11.
