Kalibo, Aklan- Uman nga nagpadumdum si kalibo vice mayor Cynthia dela cruz sa publiko nga ipabilin nga malimpyo ro palibot eabi pa ag nagatinaas ro numero it kaso it dengue sa pilang lugar sa banwa it kalibo. Sa datos it provincial health office ukon PHO-aklan , nagtaas it 94% ro numero it mga kaso it dengue sa probinsiya kumpara sa kaparehong period ko nagtaliwan nga dag-on nga nag-abot sa 1,320 kumpara sa 679 ko 2023.
Raya hay umpisa enero hasta Agosto 3, 2024. Halin hulyo 28 hasta Agosto 3, nakalista it bag-ong kaso nga 177 ag sambilog ro namatay. Ginpaathag ni vice mayor dela cruz nga ro pagtaas it kaso it dengue hay bangud sa pabag-o bag-o nga paniempo. Mag-eowas kara, kada tatlong dag-on hay may pagtaas gid man it mga kaso . Kaeabanan sigon sa mga gina-itlugan it namok hay ginahalinan it dengue. Padumdum pa nana nga kon pwede hay magbutang it mosquito repellent kapin sa mga unga eabi pa ag nagasunod ro mga namok nga may daea nga dengue sa pagsueod ag pag-uli it mga estudyante halin sa eskwelahan.
Ro peak it dengue mosquitoes hay daywang oras antes ro sunrise, ag daywang oras antes ro sunset. Mag-eowas sa banwa it kalibo nga may 217 cases, nakalista man it mataas nga numero it kaso it dengue ro malay nga may 239 nga kaso kumpara sa 13 eamang ko nagtaliwan nga dag-on; nabas nga may 105 nga kaso ag ibajay nga may 93 nga kaso. Padumdum dugang kara nga siguraduhon nga owa it mga container nga puwedeng mabutangan it stagnant water nga imaw ro breeding site it mga namok nga may ikasarang nga magsaylo it dengue.
Dapat nga insigidang magpatan-aw sa doktor ro mga maka-eksperyensiya it mga sintomas it dengue, kapareho it mataas nga eagnat, ginakunyag, pagsakit it eawas ag mga joints , sakit it ueo, sakit sa likod it mata, rashes ag pagsuka ag sa grabeng kaso pa hay pagdugo. Samtang, nagpatigayon it fogging suno kana ro munisipyo sa pilang barangay nga may mataas nga kaso it sakit.
