KALIBO, Aklan—Ginpadumdum it lokal nga gobyerno it Malay ro mga residente sa isla it Boracay angot sa responsableng pag-alaga it mga kasapatan partikular ro mga ayam.
Suno kay Malay Mayor Frolibar Bautista nga kinahangean nga magsunod ro mga raya sa Municipal Ordinance No. 432, series of 2020 may kaangtanan sa tamang pag-alaga it mga kasapatan.
Nataeupangdan nga maabu nga mga ayam nga nagawinarang makaron sa baybayon ag iba pang pampublikong lugar sa isla.
Ginpahayag ni Mayor Bautista nga ro mga ayam nga nagawinarang hay ginadakop, gina-impound ag gina dispose kon indi eagi maeukat it tag-ana.
Kabulig sigon nana sa pagpatuman it nasambit nga ordinansa hay ro Municipal Agriculture’s Office ag Municipal Disaster Risk Reduction and Management Office.
Ro sin-o man nga naga-eabag sa laye hay may nagakaigo nga multa nga 2,500 pesos.
Mag-eowas kara, ro mga dog owners nga mapas-eawan nga mapa-rehistro ro andang mga alagang ayam ag mapabakunahan kontra rabies hay may multa man nga 2,500 pesos kamana man ro mga madakpan nga nagahigku sa pampublikong lugar.
Obligado man nga magbayad it multa ro tag-ana it ayam nga indi magpasugot nga ma-obserbahan ro andang alaga ag indi pagasabton ro gastos sa pagpabueong it pasyente nga naangkit it andang ayam.
Mag-eowas sa multa pwede pang makulong it 6 nga buean ro dog owner depende sa desisyon it korte.
Gin-engganyo man ni Bautista ro mga residente ag turista nga i-report ro mga mataeupangdan nga mga ayam nga nagawinarang sa beach guards ag auxiliary police.
Nasayuran nga ro Boracay hay nauna eon nga gindeklara it Department of Health nga rabies-free ro 2013.
