Nakabaton it kadungganan ro LGU-Malay sa ginhiwat nga 6th Global Travel Exchange and B2B Roadshow sa Kuala Lumpur, Malaysia ku adlaw it Huwebes, Pebrero 20.
Sa pagpanguna nanday Hon. Frolibar Sacapaño Bautisa ag Chief Tourism Operations Officer Dr. Felix G. Delos Santos Jr, gin representa nanda ro banwa it Malay eabi eon ro isla it Boracay sa nasambit nga event, kaibahan man ro ibang mga stakeholders halin sa tourism sector it Borcay.
Ginrekognisa bilang Tourism Trailblazer si Hon. Frolibar Bautista samtang nakabaton man it kadungganan si Dr. Felix G. Delos Santos bilang LGU Tourism Champion.
Ro mga kadungganan ngara hay nagasaeamin sa andang uwa’t pahuway nga katapatan bilang mga lider sa pagsueong ag pagpabilin it posisyon it Boracay bilang sangka world class nga destinasyon.
Ro nasambit sigon nga event hay naga marka it makahueugang tikang para sa pagpabaskog it mga partnerships, ag pagbukas it puetahan para sa mga masunod nga mga pakikipagbueuligan nga makabulig sa pagpaumwad sa presensya it isla it Boracay sa pang-internasyonal nga merkado.
