Uwa eon it naabutang panchon sa dating pwesto kara nga pagasindihan it kandila ag pagahaearan it bueak ro pilang pamilya nga nagbisita sa sangka sementeryo sa banwa it Banga.
Kasunod raya sa pagkarumpag it limang grado nga apartment type kon siin ginatantya nga kapin sa 15 panchon ro nahugos nga naging rason sa pagkaigpit it pilang kabaong nga kapin daywang buean pa eamang naeobong sa nasambit nga municipal cemetery.
Suno kay Engr. Hermie Seraspi, municipal engineer it lokal nga gobyerno it Banga nga posibleng bangud sa uwa it untat nga uean hay naghumok ro eogta ag may kalumaan eon ro pundasyon sa idaeom rason nga bumigay ro mga raya.
Nakadugang pa sigon kara ro pilang baylo eon nga pag-eobong it patay kon siin pirme nga ginasilsil it supultorero ro panchon.
May kaangtanan kara, ginpahayag pa ni Engr. Seraspi nga insigidang ginsaylo it ibang panchon ro mga kabaong nga nakutkot ag nagpatigayon it disinfection sa lugar ro Municipal Disaster Risk Reduction Management Office (MDRRMO) Banga para sa kaeowasan it ikaayong eawas it mga nagasueod sa nasambit nga sementeryo.
Ginbawae man it LGU nga eapitan ro lugar ag ginpakamayad nanda nga takpan raya it trapal.
Sa makaron hay naga amat amat eon nga naga-inabo ro mga nagasueod sa sementeryo agud nga maghaead it pangamuyo sa kaeag it mga pinalangga nanda sa kabuhi
