Kalibo Aklan —–Magadihon it separadong resolusyon ro Provincial Inter-Agency Task Force ag League of Municipalities of the Philippines (LMP) -Aklan Chapter sa National IATF agud nga pasugtan nga magpanaog ro Aklan sa General Community Quarantine halin sa Enhanced Community Quarantine pagkatapos it Abril 30.
Suno kay Ibajay Mayor ag LMP Aklan Chapter President Jo-en Miraflores nga raya hay suportado it report angot sa sitwasyon it coronavirus disease (COVID-19) sa probinsiya it Aklan .
Mabahoe nga bentaha sigon nga indi eon pagpaeawigon pa ro ECQ sa Aklan hasta sa Mayo 15 bangud nga haeos tatlong domingo eon nga owa it nailistang bag-ong kaso it sakit kamana man nga owa nakaangkon it local transmission.
Mag-eowas kara, 99% suno kana nga cleared eon ro mga probable case sa Aklan .
Nasayuran nga sangka memorandum ro ginpaguwa it National IATF nga sanda eamang ro may otoridad nga magdesisyon kon magapabilin sa ECQ ro sangka probinsya ukon iga-downgrade sa GCQ .
Ro Aklan hay kaibahan sa re-evaluation it National IATF, kun sa siin, sa Abril 30 hay masayuran ro kapalaran it probinsya ag iba pang lugar nga kaeakip sa rechecking kon iga-extend hasta sa Mayo 15 ro ECQ ukon pwede eon nga magpanaog sa GCQ.
Angot kara, ginpasaeamatan nana ro mga Akeanonn sa pagiging masinueundon sa guidelines ag protocols rason nga nagmadineag-on ro implementasyon it ECQ ag border control.
