KALIBO, Aklan—Nakataeana nga pagapasakaan it kasong theft ukon shoplifting ro sangka 61 anyos nga lola matapos nga nadakpan nga nagpanakaw it nagkaeain-eain nga mga items sa grocery area it sangka bag-ong tukod nga mall sa Roxas Avenue extension sa banwa it Kalibo.
Suno kay P/Lt. Sally Bretania, deputy chief of police it Kalibo Municipal Police Station nga nakakulong makaron sa andang custodial facility ro suspek.
Nataeupangdan sigon it naka duty nga security guard sa may exit area nga masyadong puno ro ginabitbit nga bag it magueang ag kat ginpangayuan it resebo hay owa imaw it may maipakita.
Pila sigon sa mga narekober sa anang bag hay ro pahumot ukon body spray , deodorant ag iba pang items.
Sa andang pag-usisa gina alegar it suspek nga taga Bacolod city nga gintau eamang kana it anang kaibahan ro mga grocery items.
Depensa it lola nga kapigaduhon ro nagtueod kana agud nga magpanakaw apang suno kay Lt Bretania nga posibleng iba ro matuod-tuod nga rason bangud sa kaabuon ag klase it mga gintakaw nga item.
Sa makaron hay ginahueat pa ro CCTV footage it mall agud nga matumod kon may kakuntsaba ro senior citizen sa anang pagpanakaw.
Nasayuran pa nga may dati man raya nga record it pagpanakaw sa ibang lugar.
