KALIBO, Aklan— Nagreklamo sa taeatapan it pulisya ro sangka Lola nga nagabaligya it tinuean-on sa public market sa banwa it Numancia, Aklan.
Ginkilaea ro biktima kay Tessie Tabuena Reyes, 69 ag residente it Barangay Joyao-joyao, Numancia, Aklan.
Samtang, ro Vietnamese nga suspek hay nakilaea eamang sa pangaean nga “Mai-mai” ag temporaryong nagarenta sa boarding house sa Barangay Poblacion sa nasambitang banwa.
Base sa paunang imbestigasyon it Numancia Police Station, ro dumueoong hay nagapautang sa pilang ka mga negosyante sa nasambitang tindahan ag magabayad sigon ro mga raya it P20.00 kada adlaw.
Apang napueong piso eamang sigon ro masarangan nga maita-o it Lola rason nga naakig raya ag ginpilak pa kana ro nasambitang sinsilyo
Ginhana nga buytan it magueang ro alima it suspek apang naunahan imaw kara sa pagtik-eod ag gin-angkit pa ro anang alima.
Bangud kara, gilayon nga nagpadueong si Reyes sa Aklan Provincial Hospital sa banwa it Kalibo para magpaturok it anti-rabies.
Samtang, ro kaso hay ginrefer it Numancia PNP sa barangay justice system it Barangay Poblacion, Numancia, Aklan para sa nagakaigong imbestigasyon.
